Aqrar Xidmətlər Agentliyi (AXA) Yay Təcrübə Proqramı təşkil edir. Proqramda Aqronomiya və Baytarlıq ixtisası üzrə ali təhsilli mütəxəssislərin iştirakı nəzərdə tutulur. Təcrübə proqramının məqsədi aqrar sahədə kadr potensialını gücləndirməklə bilik və bacarıqları artırmaq, nəzəri bilikləri praktikaya çevirməklə yanaşı müvafiq sahədə karyera imkanları yaratmaqdır. Proqram çərçivəsində iştirakçılar aqrar sahədə tətbiq edilən yeni innovativ texnologiyalarla tanış olacaqlar. Təcrübəni uğurla başa vuran iştirakçıların müsahibə yolu ilə işə qəbulunun dəyərləndirilməsi nəzərdə tutulur.

Yay Təcrübə Proqramı 2025-ci il iyul ayının 1-dən sentyabr ayının 1-dək davam edəcək. İki aylıq proqramda sahə üzrə texniki və nəzəri biliklərə malik, aktiv, təşəbbüskar və öyrənməyə həvəsli Aqronomiya və Baytarlıq ixtisaslarını bitirmiş ali təhsilli mütəxəssislər iştirak edə bilər. Proqram AXA-nın rayon (şəhər) idarələrində keçiriləcəkdir. Proqramda iştirak üçün son müraciət tarixi 25 iyun 2025-ci ildir.