Bakı Biznes Mərkəzində Azərbaycan-Türkiyə Kənd Təsərrüfatı Biznes Forumu keçirilib. Kənd Təsərrüfatı Nazirliyinin təşkilatçılığı və İqtisadiyyat Nazirliyinin dəstəyi ilə keçirilən biznes forumda Azərbaycanın dövlət qurumlarının rəhbərləri, iş adamları, Türkiyədən gəlmiş 65 nəfərlik nümayəndə heyətinin üzvləri iştirak ediblər.
Biznes forumda çıxış edən kənd təsərrüfatı naziri İnam Kərimov tarixi dostluq, qarşılıqlı etimad əsasında qurulan Azərbaycan-Türkiyə əlaqələrinin daim möhkəmləndiyini deyib. Nazir bildirib ki, ulu öndər Heydər Əliyev Azərbaycan-Türkiyə münasibətlərini “bir millət, iki dövlət” şəklində xarakterizə edib: “İqtisadi əməkdaşlıq Azərbaycan-Türkiyə ikitərəfli əlaqələrinin ən mühüm istiqamətlərindən biridir. Ötən illər ərzində bu əlaqələrdə müsbət dinamikasının şahidi oluruq. Azərbaycanda aqrobiznes sektoru böyük potensiala malikdir. Ölkəmizdə Türkiyənin işgüzar dairələri üçün qarşılıqlı maraq kəsb edən emal və istehsal imkanları var. Bu imkanlardan istifadə edərək birgə müəssisələr yaratmaq mümkündür”.
Nazir Azərbaycan və Türkiyənin toxumçuluq, fındıqçılıq, pambıqçılıq və digər aqrar sahələrdə əməkdaşlıq imkanlarının geniş olduğunu vurğulayıb, bu forumun iş adamları arasında səmərəli dialoqun qurulmasına öz töhfəsini verəcəyinə ümidvar olduğunu deyib.
Tədbirdə çıxış edən Türkiyənin kənd təsərrüfatı və meşəçilik naziri Bekir Pakdemirli ölkəsinin Avropanın kənd təsərrüfatı sahəsində ən inkişaf etmiş dövləti olduğunu xatırladıb. Nazir bildirib ki, Türkiyənin xarici ticarətində kənd təsərrüfatı məhsulları önəmli yer tutur. Azərbaycanla Türkiyə arasında aqrar ticarətin mövcud durumunun real potensialı əks etdirmədiyini deyən nazir bu cür toplantıların qarşılıqlı əməkdaşlığı daha da genişləndirəcəyinə ümidvar olduğunu vurğulayıb.
Biznes-forumda çıxış edən digər qonaqlar iki ölkə arasında aqrar sahədə inkişaf perspektivləri, dövlət və özəl sektor arasında əməkdaşlıq imkanları, münbit investisiya mühiti, birgə layihələrin həyata keçirilməsi barədə fikirlərini bölüşüblər.
Kənd Təsərrüfatı Nazirliyi 2024-cü il üçün doktorantura və dissertanturaya qəbul elan edir
19 Aprel 2024
Aqrar Sığorta Fondunun İdarə Heyətinin sədri Fuad Sadıqov Göyçayda vətəndaşları qəbul edəcək
19 Aprel 2024
“Aqroservis” ASC-nin İdarə Heyətinin sədri Elmin Rəhmanov İmişlidə vətəndaşları qəbul edəcək
19 Aprel 2024
Ankarada Türkiyə-Azərbaycan Kənd Təsərrüfatı İcra Komitəsinin 11-ci iclası keçirilib
19 Aprel 2024
Kənd təsərrüfatı nazirinin müavini Elçin Zeynalov Lerikdə vətəndaşları qəbul edib, təsərrüfatlara baş çəkib
18 Aprel 2024