Aqrar Elm və İnnovasiya Mərkəzinin Bitki Mühafizə və Texniki Bitkilər Elmi-Tədqiqat İnstitutu özəl şirkətlərlə əməkdaşlığı genişləndirir. Bu məqsədlə Bitki Mühafizə və Texniki Bitkilər Elmi-Tədqiqat İnstitutu ilə "HH GROUP"un nümayəndələri arasında görüş keçirilib. Görüşdə birgə əməkdaşlıq məsələləri müzakirə edilib və toxum, pestisid, gübrə, kənd təsərrüfatı maşınları və avadanlıqlarının təchizatı,  yeni  texnologiyaların nümayişi və fermerlərə texniki dəstək sahəsində maarifləndirilmə işlərinin görülməsi qərara alınıb

İnstitutda gedən tədqiqat işləri ilə yaxından tanış olan şirkət nümayəndələri kənd təsərrüfatı məhsulları istehsalçılarının üzləşdiyi əsas çətinliklərin bitki mühafizəsi ilə bağlı olduğunu qeyd ediblər. Görüş iştirakçıları bu istiqamətdə birgə səylərin birləşdirilməsinin səmərəli nəticələr verəcəyini vurğulayıblar.

Bitki Mühafizə və Texniki Bitkilər Elmi-Tədqiqat İnstitutunun direktoru Elçin Xəlilov bildirib ki, institutda işçi qrupu yaradılacaq və şirkət əməkdaşları ilə birgə fəaliyyət təmin olunacaq. Fəaliyyət çərçivəsində fermerlərin maarifləndirilməsi üçün birgə seminarların keçirilməsi, onlara mövsüm ərzində elmi dəstəyin göstərilməsi nəzərdə tutulur.