Regionlarda pambıqçılığın inkişafı və pambıq yığımınadək nəqliyyat vasitələrinin saz vəziyyətə gətirilməsi məqsədilə Kənd Təsərrüfatı Nazirliyi yanında Baş Dövlət Texniki Nəzarət Xidməti müvafiq tədbirlər həyata keçirir. Bunlardan biri Kürdəmir rayonunu əhatə edib. Qurumun müfəttişləri bu rayon üzrə pambıq və pambıq məhsulları istehsalı, tədarükü, emalı və satışı ilə məşğul olan \"MKT İK\" MMC-nin balansında olan 85 ədəd nəqliyyat vasitəsinə dövlət texniki baxışı keçirib. Müasir cihazlardan istifadə edilməklə həyata keçirilən proses zamanı texnikaların istismara yararlı vəziyyətdə olduğu müəyyən edilib. Eyni zamanda dövlət texniki baxışına təqdim edilməyən və pambıqçılığın becərilməsi, yığılması və daşınmasında istifadə olunan \"MKT İK\" MMC-nin balansındakı nəqliyyat vasitələrinin daim istismara yararlı vəziyyətdə saxlanılmasına dair MMC-nin rəhbərliyinə tövsiyələr edilib, bu sahədə nəzarətin gücləndirilməsi haqqında regional bölmələrin müfəttişlərinə göstəriş verilib.