“Azərbaycan Kənd Təsərrüfatı Maliyyə Aləti” layihəsi (AZAFF) çərçivəsində fermerlərin maliyyə savadlılığını artırmaq üçün Yardımlı və Biləsuvar rayonlarında iki seminar keçirilib.

Tədbir Kənd Təsərrüfatı Nazirliyi yanında Aqrar Kredit və İnkişaf Agentliyinin dəstəyi ilə baş tutub.

Seminarlarda fermerlərə planlaşdırmanın vacibliyi, təsərrüfat əməliyyatları üzrə qeydlərin aparılması, əmanət və kredit məhsullarının əsas göstəriciləri, kredit təşkilatlarının rolu və funksiyaları, onlarla uzun müddətli və dayanıqlı əlaqələrin qurulması, fermerlər üçün alternativ maliyyələşmə imkanları, maliyyə planlaması, kənar maliyyələşməyə ehtiyacın və düzgün müddətin seçilməsi, gələcək nağd pul dövriyyəsinin və gəlirliliyin (ümumi və hər məhsul üzrə) təyin olunması barədə ətraflı məlumat verilib.

Hər iki təlim fermerlər tərəfindən böyük maraqla qarşılanıb və ümumilikdə seminarlarda yerli və ətraf rayonlardan 40-dan çox fermer iştirak edib.

Yardımlıda keçirilən seminarı giriş sözü ilə açan layihənin aparıcı eksperti İlqar Tağıyev, AZAFF layihəsi və komanda üzvləri haqqında fermerlərə qısa məlumat verib. Layihənin digər aparıcı eksperti Rauf Ağayev qeyd edib ki, bu seminarlar fermerlərin maliyyə savadlılığının artırılması, ailə büdcəsinin tərtibi və banklarla münasibətlərinin yaxşılaşdırılmasında mühüm rol oynayır. Tədbirdə fermerlərə maliyyə, ailə büdcəsi, əmanətlər və kreditlər üzrə vacib məlumatları əks etdirən xüsusi tədris vəsaiti təqdim olunub.

Biləsuvarda keçirilən təlimdə büdcənin tərtibi və maliyyə məsələləri ilə bağlı düzgün qərarların qəbul edilməsinin əhəmiyyəti fermerlərin diqqətinə çatdırılıb. Seminarın sonunda fermerlərin sualları ətraflı cavablandırılıb.

Təlimin sonunda iştirakçılara sertifikatlar təqdim olunub. AZAFF layihəsi çərçivəsində maliyyə savadlılığının artırılmasına dair təlimlərin qarşıdakı aylar ərzində həyata keçirilməsi nəzərdə tutulur.