Mayın 22-də kənd təsərrüfatı naziri Məcnun Məmmədov Neftçalada “Xıllı balıq" MMC-nin fəaliyyəti ilə tanış olub. Müəssisənin mövcud vəziyyəti, istehsal sexlərində istifadə olunan texnoloji avadanlıqlarla tanış olan nazirə məlumat verilib ki, Xəzər dənizində nərəkimilərin qorunması və artırılması məqsədilə 2003-cü ildə yaradılan “Xıllı Nərə balıqartırma Zavodu” hazırda “Xıllı balıq" MMC kimi fəaliyyət göstərir. Nərə cinsli balıqların süni yolla artırılması üzrə ixtisaslaşan bu müəssisədə əsasən Xəzər dənizinə endemik olan nərə, uzunburun, qaya balığı (kələmo) və bölgə balıqları yetişdirilir.

Hazırda müəssisədə müxtəlif yaş qrupuna aid ( 1-20 illik) 8 000 ədəd törədici fond üçün nərə cinsli  balıqlar saxlanılır. Müəssisənin illik istehsal gücü 15 milyon körpə balıq buraxılışı üçün nəzərdə tutulub. Fəaliyyət göstərdiyi müddət ərzində müəssisə tərəfindən təbii su hövzələrinə ümumilikdə 80 milyondan artıq müxtəlif növ nərə cinsli balıq körpələrinin buraxılışı həyata keçirilib. Bu il 350 min nərə körpələrinin təbii su hövzələrinə buraxılması planlaşdırılır.

Baxış zamanı ölkədə təbii resurslardan səmərəli istifadə olunmaqla balıqçılıq və akvakultura sahələrinin inkişaf etdirilməsi, balıqçılıq təsərrüfatında yeni texnologiyaların istifadəsi və ekoloji tarazlığın qorunması, rəqabətə davamlı və ekoloji təmiz məhsulların istehsalı, o cümlədən məhsuldarlığın yüksəldilməsi, ətraf mühitə təsiri nəzərə alınmaqla balıq resurslarının formalaşdırılması, habelə balıq ovunun və akvakultura təsərrüfatlarının müasir tələblərə uyğun təşkili və tənzimlənməsi, balıqçılıq və akvakultura sahələrində qanunvericiliyinin təkmilləşdirilməsi, bu sahədə dövlət- özəl əməkdaşlığının daha da inkişaf etdirilməsi, balıqçılıq və akvakulturanın yerli və qlobal dəyər zəncirlərinə inteqrasiyasının təşviq edilməsi məsələləri müzakirə edilib.

Görüş iştirakçıları balıqçılıq və akvakulturanın inkişafına dair fikirlərini bölüşüblər. Söhbət zamanı ölkədə bu sahənin inkişafı məqsədilə qarşıya qoyulan vəzifələrə toxunulub, səsləndirilən təkliflər qeydiyyata alınıb.